ಮಂಗಳವಾರ ರಾತ್ರಿಯ ಬಾರಿ ಮಳೆ ತುಂಬಿ ಹರಿದ ಶಿಡ್ಲಗುಂಡಿ ಹಳ್ಳ !

ಯಲ್ಲಾಪುರ: ಮಂಗಳವಾರ ರಾತ್ರಿಯ ಭಾರಿ ಮಳೆಯಿಂದಾಗಿ ಮುಂಡಗೋಡ ಮತ್ತು ಯಲ್ಲಾಪುರ ತಾಲೂಕುಗಳನ್ನು ವಿಭಜಿಸುವ ಶಿಡ್ಲಗುಂಡಿ ಹಳ್ಳ ತುಂಬಿ ಹರಿಯುತ್ತಿದೆ. ಹುಬ್ಬಳ್ಳಿ, ಧಾರವಾಡ, ಕಲಘಟಗಿ, ಮುಂಡಗೋಡ ತಾಲೂಕುಗಳಲ್ಲಿ ಸುರಿದ ಭಾರೀ ಮಳೆಯ ನೀರು ಶಿಡ್ಲಗುಂಡಿ ಹಳ್ಳಕ್ಕೆ ಹರಿದು ಬರುತ್ತಿದ್ದು, ಸಾಮಾನ್ಯವಾಗಿ ಹರಿಯುತ್ತಿದ್ದ ಹಳ್ಳವು ಬುಧವಾರ ಬೆಳಗ್ಗೆಯಿಂದ ತುಂಬಿ ಹರಿಯಲಾರಂಭಿಸಿದೆ ಎಂದು ಸ್ಥಳೀಯ ನಿವಾಸಿ ಮಂಜುನಾಥ ಭಟ್ಟ ತಿಳಿಸಿದ್ದಾರೆ. ಶಿಡ್ಲಗುಂಡಿ ಹಳ್ಳವು ಮುಂದೆ ಇನ್ನಿತರ ಹಳ್ಳಗಳೊಂದಿಗೆ ಸೇರಿ ಬೇಡ್ತಿ ನದಿಯನ್ನು ಸೇರುತ್ತದೆ. ಮಂಗಳವಾರಕ್ಕಿಂತ ಬುಧವಾರ ಬೆಳಗ್ಗೆ ಬೇಡ್ತಿ ನದಿಯಲ್ಲಿ ಹೆಚ್ಚಿನ ಪ್ರಮಾಣದ ನೀರು ಹರಿಯುತ್ತಿದೆ ಎಂದು ವರದಿಯಾಗಿದೆ. ಮಾಗೋಡು ಜಲಪಾತದಲ್ಲಿ ದುಮ್ಮುಕ್ಕುವ ಬೇಡ್ತಿ ನದಿಯು ನಂತರ ಗಂಗಾವಳಿ ನದಿಯಾಗಿ ರೂಪಾಂತರಗೊಳ್ಳುತ್ತದೆ. ಹುಬ್ಬಳ್ಳಿ, ಧಾರವಾಡ, ಕಲಘಟಗಿ, ಮುಂಡಗೋಡ, ಯಲ್ಲಾಪುರ, ಅಂಕೋಲಾ ತಾಲೂಕುಗಳಲ್ಲಿ ಭಾರಿ ಮಳೆ ಸುರಿದಾಗ, ಎಲ್ಲ ಹಳ್ಳ ಮತ್ತು ಕೊಳ್ಳಗಳಿಂದ ಗಂಗಾವಳಿ ನದಿ ತುಂಬಿ ಹರಿಯುವುದು ಸಾಮಾನ್ಯ. ಕಳೆದ 7-8 ವರ್ಷಗಳ ಮಳೆಗಾಲದಲ್ಲಿ ಗಂಗಾವಳಿ ನದಿ ತುಂಬಿ ಹರಿದು ಅಪಾರ ಅವಾಂತರಗಳನ್ನು ಸೃಷ್ಟಿಸಿತ್ತು. ಸದೃಢವಾದ ಸೇತುವೆಗಳು ಮತ್ತು ತೂಗು ಸೇತುವೆಗಳು ಕೊಚ್ಚಿ ಹೋಗುವಷ್ಟರ ಮಟ್ಟಿಗೆ ನದಿಯ ಪ್ರವಾಹವು ಪ್ರಭಾವಶಾಲಿಯಾಗಿತ್ತು. ಇದರಿಂದಾಗಿ ದೊಡ್ಡ ಪ್ರಮಾಣದ ಹಾನಿ ಸಂಭವಿಸಿತ್ತು. ಹೀಗಾಗಿ, ಶಿಡ್ಲಗುಂಡಿ ಹಳ್ಳದ ಮೂಲಕ ಹರಿಯುವ ನೀರು ಗಂಗಾವಳಿ ನದಿಯ ಮೂಲಕ ಸಮುದ್ರವನ್ನು ಸೇರುವವರೆಗೆ ಪ್ರಮುಖ ಪಾತ್ರ ವಹಿಸುತ್ತದೆ. ಮಂಗಳವಾರ ರಾತ್ರಿ ಕೆಲವೇ ಗಂಟೆಗಳಲ್ಲಿ ಸುರಿದ ಭಾರಿ ಮಳೆ ಈ ಪ್ರದೇಶದ ಹಾಗೂ ಸುತ್ತಮುತ್ತಲಿನ ತಾಲೂಕುಗಳ ಹಳ್ಳ, ಕೊಳ್ಳ ಮತ್ತು ನದಿಗಳನ್ನು ತುಂಬಿ ಹರಿಯುವಂತೆ ಮಾಡಿದೆ. 

    ಈ ಸನ್ನಿವೇಶದಿಂದಾಗಿ, ಮತ್ತೆ ಇಂತಹುದೇ ಮಳೆ ಸುರಿದರೇ ಗಂಗಾವಳಿ ನದಿಯಲ್ಲಿ ಪ್ರವಾಹದ ಆತಂಕ ಮೂಡಲಿದೆ. , ಈ ಪ್ರದೇಶದ ಜನರು ಎಚ್ಚರಿಕೆಯಿಂದ ಇರಬೇಕಾಗಿದೆ.