ಯಲ್ಲಾಪುರದ ಗ್ರಾಮ ಒಕ್ಕಲು ಸಂಘದಲ್ಲಿ ಕೆಂಪೇಗೌಡ ಜಯಂತಿ ಆಚರಣೆ, ವೈವಿಧ್ಯಮಯ ಕಾರ್ಯಕ್ರಮ

ಯಲ್ಲಾಪುರ: ಇಲ್ಲಿನ ಗ್ರಾಮ ಒಕ್ಕಲು ಸಂಘವು ಇತ್ತೀಚೆಗೆ ಒಂದು ಸರಣಿ ಪ್ರಮುಖ ಕಾರ್ಯಕ್ರಮಗಳನ್ನು ಆಯೋಜಿಸಿತ್ತು,  ಕೆಂಪೇಗೌಡ ಜಯಂತಿ ಆಚರಣೆ, ನಿವೃತ್ತ ಸರ್ಕಾರಿ ನೌಕರರನ್ನು ಗೌರವಿಸುವ ಕಾರ್ಯಕ್ರಮ ಹಾಗೂ ಗ್ರಾಮದ 102ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ಪಠ್ಯ ವಿತರಣೆ ಕಾರ್ಯಕ್ರಮಗಳು ಈ ಸಮಾರಂಭದ ಮುಖ್ಯ ಆಕರ್ಷಣೆಗಳಾಗಿದ್ದವು.

  ಇತ್ತೀಚೆಗೆ ಯಲ್ಲಾಪುರದ ಕಾರವಾರ ರಸ್ತೆಯಲ್ಲಿರುವ ಅಂಬೇಡ್ಕರ್ ಸಭಾಭವನದಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಸಂಘದ ಅಧ್ಯಕ್ಷ ಶೇಖರ್ ಪಟಗಾರ ಅವರು ಮಾತನಾಡಿ, ಸಮಾಜದ ಸರ್ವತೋಮುಖ ಅಭಿವೃದ್ಧಿಯಲ್ಲಿ ಪ್ರತಿಯೊಬ್ಬರ ಪಾತ್ರ ಮಹತ್ವದ್ದಾಗಿದೆ ಎಂದು ಹೇಳಿದರು. ಇಂತಹ ಕಾರ್ಯಕ್ರಮಗಳು ಯುವಜನತೆ ಹಾಗೂ ಹಿರಿಯರನ್ನು ಪ್ರೋತ್ಸಾಹಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ ಎಂದು ಅವರು ಅಭಿಪ್ರಾಯಪಟ್ಟರು.

   ಕೆಂಪೇಗೌಡರ ಜೀವನ ಮತ್ತು ಕಾರ್ಯಗಳ ಕುರಿತು ಬಿ. ಆರ್. ಪಿ. ಪ್ರಶಾಂತ್ ಪಟಗಾರ ಅವರು ವಿಸ್ತಾರವಾದ ಉಪನ್ಯಾಸವನ್ನು ನೀಡಿದರು. 

  ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿ ಆಗಮಿಸಿದ್ದ ಆನಗೋಡ್ ಗ್ರಾಮ ಪಂಚಾಯತಿಯ ಪಿಡಿಒ ನಾರಾಯಣಗೌಡ ಅವರು ಸಂಘದ ಈ ಕಾರ್ಯವನ್ನು ಶ್ಲಾಘಿಸಿದರು. 

  ಟ್ಯಾಕ್ಸಿ ಮಾಲೀಕರ ಸಂಘದ ಅಧ್ಯಕ್ಷ ಗಜು ಪಟಗಾರ ಹಾಗೂ ಗಣಪತಿ ಪಟಗಾರ ಅವರು ಕೂಡ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದರು.

  ಸಂಘದ ಸದಸ್ಯರಾದ ಎಂ. ಎಸ್. ಪಟಗಾರ (ಶಿರಸಿ), ಕಾರ್ಯದರ್ಶಿ ಎಂ. ಆರ್. ಪಟಗಾರ, ಖಜಾಂಚಿ ಸತೀಶ್ ಪಟಗಾರ ಹಾಗೂ ಕ್ರೀಡಾ ಕಾರ್ಯದರ್ಶಿ ಮಂಗಲಾ ಪಟಗಾರ ಅವರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು. 

   ಇದೇ ಸಂದರ್ಭದಲ್ಲಿ ನಿವೃತ್ತ ಶಿಕ್ಷಕ ದೇವಿದಾಸ್ ಪಟಗಾರ ಹಾಗೂ ಅಂಗನವಾಡಿ ಕಾರ್ಯಕರ್ತೆ ಲಕ್ಷ್ಮಿ ಪಟಗಾರ ಅವರನ್ನು ಸನ್ಮಾನಿಸಲಾಯಿತು.

   ಶಿಕ್ಷಕ ಗಂಗಾಧರ ಪಟಗಾರ ಸಂಘದ ಇತಿಹಾಸ ಹಾಗೂ ಭವಿಷ್ಯದ ಯೋಜನೆಗಳ ಕುರಿತು ಪ್ರಾಸ್ತಾವಿಕವಾಗಿ ಮಾತನಾಡಿದರು. ಎಂ. ಆರ್. ಪಟಗಾರ ಸ್ವಾಗತವನ್ನು, ಶಿಕ್ಷಕ ರಾಘವೇಂದ್ರ ಗೌಡ ನಿರೂಪಿಸಿ ಹಾಗೂ ಶಿಕ್ಷಕ ಈಶ್ವರ ಪಟಗಾರ ವಂದಿಸಿದರು.