ಮಳೆಯ ಭಯಾನಕ ವಾತಾವರಣದ ನಂತರ ಗಾಳಿಯ ಅವಾಂತರಗಳ ಸೃಷ್ಟಿ, ಬಸ್ ನಿಲ್ದಾಣದಲ್ಲಿ ಹಾರಿ ಹೋದ ಶೀಟ್ ಗಳು

ಯಲ್ಲಾಪುರ ; ಯಲ್ಲಾಪುರ ಪಟ್ಟಣ ಹಾಗೂ ಗ್ರಾಮೀಣ ವ್ಯಾಪ್ತಿಯಲ್ಲಿ ಕಳೆದ ಒಂದು ವಾರದಿಂದ ಸುರಿಯುತ್ತಿರುವ ಭಾರಿ ಮಳೆ ನಂತರ ಗಾಳಿ ಕೆಟ್ಟ ಪ್ರಭಾವ ಬೀರಿದ್ದು, ಮಳೆಯಲ್ಲಿ ಮುರಿದು ಬೀಳುವ ಮರಗಳು, ಹಾರಿಹೋಗದ ತಗಡುಗಳು ಇದೀಗ ಗಂಭೀರ ಸ್ಥಿತಿ ನಿರ್ಮಾಣವಾಗಿದೆ.

  ಜಿಲ್ಲೆಗೆ ಹೋಲಿಸದರೇ, ಯಲ್ಲಾಪುರ ತಾಲೂಕಿನಲ್ಲಿ ಮಳೆ ಅಷ್ಟೇನೂ ಅವಾಂತರ ಸೃಷ್ಟಿಸಿದೆ ಇದ್ದರು, ಕಳೆದ ಎರಡು ದಿನಗಳಿಂದ ಬೀಸುವ ಭಾರಿ ಗಾಳಿಯಿಂದಾಗಿ ಬಹಳಷ್ಟು ಅವಾಂತರಗಳು ಸೃಷ್ಟಿಯಾಗಿದೆ. ಓರ್ವ ವ್ಯಕ್ತಿಯ ಜೀವ ಕೂಡ ಹೋಗಿದೆ. ಪಟ್ಟಣದ ಬಸ್ ನಿಲ್ದಾಣದಲ್ಲಿ ಅಳವಡಿಸಲಾದ ತಗಡುಗಳು ಗಾಳಿಯಿಂದಾಗಿ ಹಾರಿ ಹೋಗಿದ್ದು ಸದೃಢವಾದ ಬೇಸ್ ಇರುವ ತಗಡುಗಳ ಹಾರಿ ಹೋಗಿದ್ದ ಪರಿಣಾಮ ಇನ್ನಿತರ ಜಾಗಗಳಲ್ಲಿ ಎಷ್ಟೊಂದು ಪರಿಣಾಮ ಬೀರಿರಬಹುದು ಎಂದು ಊಹಿಸಬಹುದಾಗಿದೆ. ಸುದೈವವಶಾತಃ ಈ ತಗಡುಗಳು ಪ್ರಯಾಣಿಕರ ಮೇಲೆ ಬೀಳದೆ ಇರುವ ಕಾರಣಕ್ಕೆ ಯಾವುದೇ ಅವಘಡ ಸಂಭವಿಸಿಲ್ಲ

   ಪಟ್ಟಣ ವ್ಯಾಪ್ತಿಯಲ್ಲಿ ಯಾರೂ ಕೂಡ ಚತ್ರಿ ಹಿಡಿದು ನಡೆದಾಡುವ ಪರಿಸ್ಥಿತಿಯಲ್ಲಿಲ್ಲ. ಯಾಕೆಂದರೆ ಚತ್ರಿ ಮಳೆಯ ನೀರು ತಡೆಯುವ ಬದಲು ಅದನ್ನು ದುರಸ್ತಿ ಮಾಡುವ ಕಡೆಗೆ ನೆನೆಸಿಕೊಂಡು ಓಡಾಡುವ ಮಾಲಿಕರಿಗೆ ಸಮಸ್ಯೆಯಾಗಿದೆ.  

 ಇದೀಗ ಸಾಮಾನ್ಯವಾಗಿ ಮಳೆ ಸುರಿಯುತ್ತಿದ್ದರು ಪ್ರಕೃತಿ ಗಾಳಿಯ ಮೂಲಕ ತಾಲೂಕಿನಲ್ಲಿ ವಿಪರ್ಯಾಸ ಪರಿಣಾಮಗಳನ್ನು ತೋರಿಸುತ್ತಿದೆ. 

ರಾಜ ಕಾಲುವೆಯ ದುರಸ್ತಿ ಹಾಗೂ ಅಗತ್ಯತೆ ಬಗ್ಗೆ ಅಧಿಕಾರಿಗಳಿಗೆ ಮನವರಿಕೆ ಮಾಡಿಕೊಟ್ಟ ಪಪಂ ಸದಸ್ಯ ಕೆಸರಲಿ

ಯಲ್ಲಾಪುರ : ಇತ್ತೀಚೆಗೆ ಸುರಿದ ಭಾರಿ ಮಳೆಯಿಂದಾಗಿ ಯಲ್ಲಾಪುರ ಪಟ್ಟಣ ವ್ಯಾಪ್ತಿಯಲ್ಲಿ ಮಳೆಯ ನೀರು ಸರಾಗಿವಾಗಿ ಸಾಗದೆ ರಾಜಕಲುವೆಯೂ ಸರಿಯಾಗಿ ಇಲ್ಲದೆ ಅರೆಬರೆಗೊಂಡ ಕಾಮಗಾರಿ ಮೂಲಕ ಗೋಪಾಲಕೃಷ್ಣ ಗಲ್ಲಿಯ ರೈತರ ಭೂಮಿಗೆ ನೀರು ನುಗ್ಗುತ್ತಿದೆ, ಈ ಕುರಿತು ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿ ವಲಿಶಾ ಗಲ್ಲಿ ಪ.ಪಂ ಸದಸ್ಯ ಕೇಸರ್ ಸಯ್ಯದಲಿ ಬುಧವಾರ ಪ.ಪಂ ಮುಖ್ಯಾಧಿಗಳನ್ನು ಸ್ಥಳಕ್ಕೆ ಕರೆದು ಸಂಫೂರ್ಣ ವಿವರಣೆ ನೀಡಿದರು.

   ಯಲ್ಲಾಪುರ ಪಟ್ಟಣದ ಕಾಳಮ್ಮನಗರ ಈಶ್ವರದಲ್ಲಿ ಗೋಪಾಲಕೃಷ್ಣ ಗಲ್ಲಿ, ಅಂಬೇಡ್ಕರ್ ನಗರ, ಇಸ್ಲಾಂ ಗಲ್ಲಿ, ಅಕ್ಬರ್ ಗಲ್ಲಿ ಸೇರಿದಂತೆ ಬಹುತೇಕ ಶೇ . 65 ರಷ್ಟು ನೀರನ್ನು ಇದೇ ಕಾಲುವೆಯ ಮೂಲಕ ತಣ್ಣೀರು ಹಳ್ಳಕ್ಕೆ ಹರಿದು ಹೋಗುತ್ತದೆ. ಈ ಮಧ್ಯೆ ಈ ಭಾಗದಲ್ಲಿ ಮನೆ ಮತ್ತು ಇನ್ನಿತರ ಕೆಲಸಗಳು ನಡೆದಿರುವುದರಿಂದ ನೀರಿನ ಹರಿವಿನ ಒತ್ತಡ ಹೆಚ್ಚಾಗಿದ್ದು, ಒತ್ತಡ ಸಹಿಸಲಾರದ ಇಷ್ಟೊಂದು ನೀರು, ಕೃಷಿಭೂಮಿಗೆ ನುಗ್ಗುತ್ತಿದೆ ಎಂದು ಅಧಿಕಾರಿಗಳಿಗೆ  ಕೆಸರ್ ಸಯ್ಯದಲಿ ತಿಳಿಸಿದರು.

   ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ ಸುನೀಲ ಗಾವಡೆ ಸೇರಿದಂತೆ, ಆರೋಗ್ಯ ನಿರೀಕ್ಷಕ ಗುರು ಗಡಗಿ ಇನ್ನಿತರ ಅಧಿಕಾರಿಗಳನ್ನು ರಾಜಕಾಲುವೆ ಹರಿದು ಹೋಗುವ ಪ್ರದೇಶಕ್ಕೆ ತೆರಳಿ ಅರೆಬರೆ ಕಾಮಗಾರಿಯಾದ ಗೋಪಾಲಕೃಷ್ಣ ಗಲ್ಲಿಯಲ್ಲಿ ಯಲ್ಲಾಪುರದ ಎಲ್ಲ ಭಾಗದ ನೀರು ಹರಿದು ಹೋಗುವ ರಾಜ ಕಾಲವೆಯಲ್ಲಿ ಆಗಿರುವ ಅನಾಹುತವನ್ನು ಪ್ರತ್ಯಕ್ಷವಾಗಿ ಗಮನಿಸಿದರು.

    ಕಳೆದ ಮೂರು ವರ್ಷದಿಂದ ರಾಜಕಾಲುವೆಯನ್ನು ಸದೃಢವಾಗಿ ಕಟ್ಟುವ ಕಾರ್ಯ ನಡೆದಿದ್ದರೂ ಕೂಡ, ಕೆಲಸವನ್ನು ಅರ್ಧಕ್ಕೆ ನಿಲ್ಲಿಸಲಾಗಿದೆ. ಹೀಗಾಗಿ ಈ ಬಾರಿ ಕೂಡ ಸ್ಥಳೀಯರು ಬಹಳಷ್ಟು ಸಮಸ್ಯೆಗಳನ್ನು ಎದುರಿಸುವಂತಾಗಿದೆ ಈ ಬಗ್ಗೆ ಪಟ್ಟಣ ಪಂಚಾಯತಿ ಗಮನ ಹರಿಸುವಂತೆ ಕೆಸರಲಿ ವಿನಂತಿಸಿದರು.

  ಈ ಬಗ್ಗೆ ಮುಂದಿನ ಪಟ್ಟಣ ಪಂಚಾಯಿತಿ ಸಾಮಾನ್ಯ ಸಭೆಯಲ್ಲಿ ಎಲ್ಲ ಸದಸ್ಯರ ಗಮನಕ್ಕೆ ತಂದು ಶಾಶ್ವತ ಯೋಜನೆಯನ್ನು ನಿರ್ಮಿಸಲಾಗುವುದು, ಈ ಕುರಿತು ಶಾಸಕರೊಂದಿಗೂ ಕೂಡ ಮಾತನಾಡಲಾಗುವುದು ಎಂದು ಪಟ್ಟಣ ಪಂಚಾಯತಿ ಮುಖ್ಯಾಧಿಕಾರಿ ಸುನೀಲ ಗಾವಡೆ ಭರವಸೆ ನೀಡಿದರು.

____

ಮಹಿಳಾ ಮಂಡಳ ಸಮೀಪದ ಕೊಳವೆ ಭಾವಿ ಹಾಳಾದ ಕೆಲವೇ ನಿಮಿಷದಲ್ಲಿ ವಲೀಶಾಗಲ್ಲಿ ವಾರ್ಡ್ ಸದಸ್ಯ ಕೇಸರಲಿ ಸಯ್ಯದರಿಂದ ದುರಸ್ತಿ. 

ಯಲ್ಲಾಪುರ ಪಟ್ಟಣ ಪಂಚಾಯಿತಿ ವಾರ್ಡ್ ನಂಬರ್ ಎರಡು ಬಲಿಷ್ಠ ಗಲ್ಲಿ ಸದಸ್ಯ ಕೇಸರಲ್ಲಿ ಸೈಯದ್ ತಮ್ಮ ವಾರ್ಡಿನ ಮಹಿಳಾ ಮಂಡಲ ಸಮೀಪದ ಕೊಡಬೇಕಾದ ಕೆಲವೇ ನಿಮಿಷದಲ್ಲಿ ಜನರ ಆಗ್ರಹಕ್ಕೆ ಸ್ಪಂದಿಸಿ ತಕ್ಷಣ ರಿಪೇರಿ ಮಾಡಿ ಜನರ ಸೇವೆಗೆ ನೀಡಿದ್ದಾರೆ. ಅಲ್ಲಿಯ ಜನ ಕೆಸರಲ್ಲಿ ಅವರ ಜನಪರ ಕಾಳಜಿಗೆ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.

ಒಂದು ರಿಲೆ ರಿಪೇರಿ‌ ಮಾಡಲಾಗದೇ ಯಲ್ಲಾಪುರ ಜನರಿಗೆ ತೊಂದರೆ ಕೊಡುತ್ತಿರುವ ಹೆಸ್ಕಾಂ ಅಧಿಕಾರಿಗಳು/ ವರದಿ : ಜಗದೀಶ ನಾಯಕ

ಯಲ್ಲಾಪುರ : ಯಲ್ಲಾಪುರ ಪವರ್ ಸ್ಟೇಷನ್ ನಲ್ಲಿರುವ ಒಂದು ರಿಲೆ(ಎಲೆಕ್ಟ್ರಿಕಲ್ ಸ್ವಿಚ್ಛ್) ಯನ್ನು ದುರಸ್ತಿ ಮಾಡಲಾಗುತ್ತದೆ ಕಳೆದ ಹಲವು ದಿನಗಳಿಂದ ಜನರಿಗೆ ತೊಂದರೆ ನೀಡುತ್ತಿರುವ ಯಲ್ಲಾಪುರದ ಹೆಸ್ಕಾಂ ವಿಭಾಗದ ಅಧಿಕಾರಿಗಳ ನಿರ್ಲಕ್ಷದ ಬಗ್ಗೆ ಜನ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

  ಕಿರವತ್ತಿಯಿಂದ ಯಲ್ಲಾಪುರ ಪವರ್ ಸ್ಟೇಷನ್ ಗೆ 33 ಕೆ ವಿ ವಿದ್ಯುತ್ ಪೂರೈಕೆಯಾಗುತ್ತಿದೆ, ಯಲ್ಲಾಪುರ ಪವರ್ ಸ್ಟೇಷನ್ ನಿಂದ 11 ಕೆ ವಿ ಯ ವಿದ್ಯುತ್ ತಾಲೂಕಿನ ಪಟ್ಟಣ, ಗ್ರಾಮೀಣ ಭಾಗಕ್ಕೂ ಪೂರೈಕೆಯಾಗುತ್ತಿದೆ. ಅಲ್ಲಿಯ ಟ್ರಾನ್ಸ್ಫಾರ್ಮರ್ ಗಳು 11 ಕೆ ವಿ ಯನ್ನು 230 ವೋಲ್ಟ್ ಆಗಿ ಪರಿವರ್ತಿಸಿ ಮನೆಗೆ ಅಥವಾ ಇನ್ನಿತರ ಉದ್ಯಮಗಳಿಗೆ 2 ಫೇಸ್ ಅಥವಾ 3 ಫೇಸ್ ಆಗಿ ಪೂರೈಸುತ್ತದೆ. 

   ಯಲ್ಲಾಪುರದಲ್ಲಿ ಕಾರ್ಯನಿರ್ವಹಿಸುವ ಕೆಳಹಂತದ ಸಿಬ್ಬಂದಿಗಳು ತಮ್ಮ ಜೀವವನ್ನು ಅಡವಿಟ್ಟು ಕೆಲಸ ಮಾಡುತ್ತಿದ್ದಾರೆ. ಆದರೆ, ಎಲೇಕ್ಟ್ರಿಕಲ್ ಬಿಇ ಡಿಪ್ಲೋಮಾ ಪದವಿ ಹೊಂದಿದ ಅಧಿಕಾರಿಗಳು ಮಾತ್ರ ಟೇಬಲ್ ಕುರ್ಚಿ ಬಿಟ್ಟು ಅಲುಗಾಡುತ್ತಿಲ್ಲ. ಯಲ್ಲಾಪುರ ಪಟ್ಟಣದಲ್ಲಿ ಕಳೆದ ನಾಲ್ಕು ದಿನಗಳಿಂದ ಪವರ್ ಸ್ಟೇಷನ್ ನಲ್ಲಿ ಒಂದು ರಿಲೇ(ಆಟೋಮೇಟಿಕ್ ಎಳೆಕ್ಟ್ರಿಕಲ್ ಸ್ವಿಚ್) ಸಮಸ್ಯೆಯಿಂದ ತೀವ್ರ ವಿದ್ಯುತ್ ವ್ಯತ್ಯಯವಾಗುತ್ತಿದೆ.  ಇದಕ್ಕೆ ಕಾರಣ ಗಾಳಿ ಮಳೆ ಎಂದು ಸಬೂಬಿ ಹೇಳಿ ಜನರನ್ನು ಮರಳು ಮಾಡಲಾಗುತ್ತಿದೆ.

    ಇದುವರೆಗೂ ಮಳೆ ಗಾಳಿಯಿಂದ ಬಿದ್ದ ಮರ ಟೊಂಗೆಗಳಿಂದ ವಿದ್ಯುತ್ ವ್ಯತ್ಯಯವಾಗುತ್ತಿತ್ತು ಎಂದು ಎಣಿಸಲಾಗಿತ್ತು, ಹಾಗೆ ವಿದ್ಯುತ್ ವ್ಯತ್ಯಯವಾದಾಗ ಕೆಳಹಂತದ ಹೆಸ್ಕಾಂ ಕೆಲಸಗಾರರು ಅತಿ ಶೀಘ್ರವಾಗಿ ದುರಸ್ತಿ ಮಾಡಿ ವಿದ್ಯುತ್ ಪೂರೈಸುವ ಕೆಲಸವನ್ನು ಮಾಡುತ್ತಿದ್ದರು. ಆದರೇ, ಇದೀಗ ಯಲ್ಲಾಪುರ ಪವರ್ ಸ್ಟೇಷನ್ನಲ್ಲಿ ಸಮಸ್ಯೆಯಾಗಿದ್ದು, ಇದಕ್ಕೆಲ್ಲ ಅಧಿಕಾರಿಗಳ ನಿರ್ಲಕ್ಷ ಹಾಗೂ ಇದುವರೆಗೂ ತೆಗೆದುಕೊಳ್ಳದ ಮುಂಜಾಗ್ರತೆಗೆ ಕಾರಣವಾಗಿದೆ ಎನ್ನಲಾಗಿದೆ.

   ಈ ಬಾರಿ ಯಲ್ಲಾಪುರದಲ್ಲಿ ಅತ್ಯಂತ ಹೆಚ್ಚು ಮಳೆಯಾಗಿಲ್ಲ ವಾಡಿಕೆಯಷ್ಟೇ ಮಳೆ ಹೆಚ್ಚು ಕಡಿಮೆ ಸುರಿದಿದೆ. ಗಾಳಿಯ ಪ್ರಮಾಣವು ಕಡಿಮೆಯಾಗಿದ್ದು, ಎರಡು ಮೂರು ದಿನಗಳಿಂದ ಗಾಳಿ ಬೀಸುತ್ತಿದೆ. ಹೀಗಾಗಿ ಯಾವುದೇ ಅವಘಡಗಳು ವಿದ್ಯುತ್ ತಂತೀಯ ಮೇಲೆ ಕಂಬದ ಮೇಲೆ ಸಂಭವಿಸಲು ಸಾಧ್ಯವಿಲ್ಲ ಎಂದು ಹೇಳಲಾಗುತ್ತಿದೆ. ಅದರಲ್ಲಿಯೂ ಕಿರುವತ್ತಿಯಿಂದ ಯಲ್ಲಾಪುರ ಸ್ಟೇಷನ್ ಗೆ ಪೂರೈಕೆ ಆಗುವ 33 ಕೆವಿ ವಿದ್ಯುತ್ ಪೂರೈಕೆ ಮಾರ್ಗ ಗಳ ಅಕ್ಕ ಪಕ್ಕದಲ್ಲಿ ಅರಣ್ಯ ಇಲಾಖೆ ಸೇರಿದಂತೆ ಖಾಸಗಿ ಯವರಿಗೂ ಸಹಿತ ಯಾವುದೇ ಮರ ಅಥವಾ ಇತರೆ ಗಿಡಗಳನ್ನು ಬೆಳೆಸುವ ಅಧಿಕಾರ ಇಲ್ಲ ಮುಂಜಾಗ್ರತೆ ವಹಿಸಬೇಕಾದ ಅಧಿಕಾರಿಗಳು ನಿರ್ಲಕ್ಷ ವಹಿಸಿ ತಮ್ಮದೇ ಸಿಬ್ಬಂದಿಗಳಿಗೆ ಮಳೆಗಾಲದಲ್ಲಿ ಹೆಚ್ಚುವರಿ ಕೆಲಸ ನೀಡುತ್ತಿದ್ದಾರೆ ಎನ್ನುವ ಆರೋಪ ಇದೆ.

  ಇದೀಗ ಎಲ್ಲಾಪುರ ಸ್ಟೇಷನ್ನಲ್ಲಿ ಸ್ವಿಚ್ ತೊಂದರೆಯಾಗಿದ್ದು ಅದನ್ನು ದುರಸ್ತಿ ಮಾಡಬೇಕಾಗಿದ್ದ ಬಿಇ ಮತ್ತು ಡಿಪ್ಲೋಮಾ ಹೋಲ್ಡರ್ ಎಲೆಕ್ಟ್ರಿಕಲ್ ಇಂಜಿನಿಗಳು ಏನು ಮಾಡುತ್ತಿದ್ದಾರೆ ಎನ್ನುವ ಪ್ರಶ್ನೆ ಉದ್ಭವವಾಗಿದೆ.

ಮೇ ತಿಂಗಳಲ್ಲಿ ಹೆಸ್ಕಾಂ ಇಲಾಖೆಗೆ ಸೂಚನೆ ನೀಡಿದ್ದ ಅರಣ್ಯ ಇಲಾಖೆ

ರಾಷ್ಟ್ರೀಯ ಹೆದ್ದಾರಿ, ರಾಜ್ಯ ಹೆದ್ದಾರಿ, ಜಿ.ಪಂ ರಸ್ತೆಗಳು ಸೇರಿದಂತೆ ಹೆಸ್ಕಾಂ ವಿದ್ಯುತ್ ಲೈನ್ ಗಳಿಗೆ ಸಂಬಂಧಿಸಿದಂತೆ ಯಲ್ಲಾಪುರದ ಅರಣ್ಯ ಇಲಾಖೆ ಉಪ ವಿಭಾಗದವರು ಈಗಾಗಲೇ ಸಮಸ್ಯೆ ಸಂಭವಿಸಬಹುದಾದ ಮರಗಳ ಕಟಾವಿಗೆ ಮಾಹಿತಿ ಕೇಳಿ ನಿರ್ದೇಶನ ನೀಡಿದ್ದರು. ಅದು ಕೂಡ ಮೇ ತಿಂಗಳಲ್ಲಿ, ವಿದ್ಯುತ್ ತಂತಿ ಮೇಲೆ ಬೀಳಬಹುದಾದ ಮರಗಳು ಟೊಂಗೆಗಳು, ರಾಷ್ಟ್ರೀಯ ಹೆದ್ದಾರಿಗೆ, ರಾಜ್ಯ ಹೆದ್ದಾರಿಗೆ, ಜಿಲ್ಲಾ ಪಂಚಾಯತ್ ರಸ್ತೆಗಳಿಗೆ ಗ್ರಾಮೀಣ ರಸ್ತೆಗಳಿಗೆ ಅಡಚಣೆಯಾಗುವ ಮರಗಳ ಕುರಿತು ಮಾಹಿತಿ ಕೇಳಿ ಅವುಗಳ ಕಟಾವು ಬಗ್ಗೆ ಕೂಡ ಅರಣ್ಯ ಇಲಾಖೆ ಸಂಬಂಧಿಸಿದ ಪ್ರತಿ ಇಲಾಖೆಗೂ ಮುಂಜಾಗ್ರತೆ ವಹಿಸುವಂತೆ ಈ ಸಂದರ್ಭದಲ್ಲಿ ಅರಣ್ಯ ಇಲಾಖೆಗೆ ಮಾಹಿತಿ ನೀಡಿ ಕಟಿಂಗ್ ಮಾಡುವಂತೆ ಸೂಚಿಸಿದ್ದರೂ ಕೂಡ ಯಾವುದೇ ಇಲಾಖೆಗಳು ಸ್ಪಂದಿಸಿಲ್ಲ ಎನ್ನುವ ಆರೋಪ ಕೇಳಿ ಬಂದಿದೆ. ರಾಷ್ಟ್ರೀಯ ಹೆದ್ದಾರಿ ಲೋಕೋಪಯೋಗಿ ಇಲಾಖೆ ಜಿಲ್ಲಾ ಪಂಚಾಯಿತಿ ಇಂಜಿನಿಯರಿಂಗ್ ವಿಭಾಗ ಹೆಸ್ಕಾಂ ಅಧಿಕಾರಿಗಳ ದಿವ್ಯ ನಿರ್ಲಕ್ಷ್ಯ ಸಾರ್ವಜನಿಕರಿಗೆ ತಲೆ ನೋವಾಗಿದೆ.

  ಅಧಿಕಾರಿಗಳ ನಿರ್ಲಕ್ಷಕ್ಕೆ ಮಂಗಳವಾರ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸುತ್ತಿದ್ದ ವ್ಯಕ್ತಿ ಒಬ್ಬನ ಮೇಲೆ ಮರ ಬಿದ್ದು ಗಾಯಗೊಂಡಿದ್ದರೆ ಬುಧವಾರ ಮಂಚಿಕೇರಿ ಬಳಿ ಬರುವ ವ್ಯಕ್ತಿ ಸಾವನಪ್ಪಿದ್ದಾನೆ.

   ಅನಿಯಮಿತವಾದ ವಿದ್ಯುತ್ ಪೂರೈಕೆ, ರಸ್ತೆ ಮೇಲೆ ಮುರಿದು ಬೀಳುವ ಮರಗಳು ಕುರಿತು ಯಲ್ಲಾಪುರದಲ್ಲಿ ಕಾರ್ಯನಿರ್ವಹಿಸುವ ವಿವಿಧ ಇಲಾಖೆ ಅಧಿಕಾರಿಗಳ ದಿವ್ಯ ನಿರ್ಲಕ್ಷದ ಕುರಿತು ಶಾಸಕ ಶಿವರಾಮ್ ಹೆಬ್ಬಾರ್, ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ್ ವೈದ್ಯ, ಜಿಲ್ಲೆಯ ಹಿರಿಯ ಅಧಿಕಾರಿಗಳು ಕಾಳಜಿ ವಹಿಸಬೇಕೆಂದು ಸಾರ್ವಜನಿಕರ ಆಗ್ರಹವಾಗಿದೆ.

ಮಂಚಿಕೇರಿಯಲ್ಲಿ ಮರ ಬಿದ್ದು ಬೈಕ್ ಸವಾರ ಸ್ಥಳದಲ್ಲಿಯೇ ಸಾವು

ಯಲ್ಲಾಪುರ ; ತಾಲೂಕಿನ ಮಂಚಿಕೇರಿಯ ಹಾಸಣಗಿ ಪಂಚಾಯತಿ ವ್ಯಾಪ್ತಿಯ ಮಾಳಕೊಪ್ಪ ಶಾಲೆಯ ಎದುರಿಗೆ ಬುಧವಾರ ಬೆಳಿಗ್ಗೆ ರಭಸವಾಗಿ ಬಿಸಿದ ಗಾಳಿಗೆ ಮರವೊಂದು ಬೈಕ್ ಸವಾರನ ಮೇಲೆ ಬಿದ್ದು ಬೈಕ್  ಸವಾರ ಸ್ಥಳದಲ್ಲಿಯೇ ಮೃತಪಟ್ಟಿರುವ ಘಟನೆ ನಡೆದಿದೆ.

   ಮೃತ ವ್ಯಕ್ತಿಯನ್ನು ವಿನಯ ಮಂಜುನಾಥ ಗಾಡೀಗ (27) ಎಂದು ಗುರುತಿಸಲಾಗಿದ್ದು ಕಬ್ಬಿನಗದ್ದೆ ನಿವಾಸಿಯಾಗಿದ್ದಾನೆ‌. ತಾಲೂಕಿನಾಧ್ಯಂತ ಸುರಿಯುತ್ತಿರುವ ಭಾರಿ ಮಳೆ ಕಡಿಮೆ ಆಗಿದ್ದರೂ ಕೂಡ ಆ ಗಾಳಿಯ ಪ್ರಮಾಣ ಇನ್ನೂ ಹೆಚ್ಚಾಗಿದೆ. ವಾರದಿಂದ ಸುರಿದ‌ ಭಾರಿ  ಮಳೆಗೆ ಮಣ್ಣು ದುರ್ಭಲವಾಗಿ ಮರಗಳು ಉರುಳಿ ಬೀಳುತ್ತಿವೆ. ಮಂಗಳವಾರ ಸಂಜೆ ಅರ್ಲಿಕೊಪ್ಪದಲ್ಲಿ ಬೈಕ್ ಸವಾರನ‌ ಮೇಲೆ ಮರದ ಟೊಂಗೆ ಬಿದ್ದು ಆತ ಗಾಯಗೊಂಡಿದ್ದ, ಬುಧವಾರ ಮಾಳಕೊಪ್ಪ ಶಾಲೆಯ ಹತ್ತಿರ ಮರಬಿದ್ದು ಸವಾರ ಸ್ಥಳದಲ್ಲಿಯೇ ಮ್ರತನಾಗಿದ್ದಾನೆ.

  ಘಟನಾ ಸ್ಥಳಕ್ಕೆ ತಹಶೀಲ್ದಾರ ಅಶೋಕ ಭಟ್ಟ, ಪೊಲೀಸ್ ನಿರೀಕ್ಷಕರಾದ ರಮೇಶ ಹಾನಾಪುರ, ಪಿಎಸ್ಐ ಸಿದ್ದಪ್ಪ ಗುಡಿ, ಸೇರಿದಂತೆ ಅರಣ್ಯ ಇಲಾಖೆಯ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲಿಸಿದ್ದಾರೆ.

ಬೈಕ್ ಮೇಲೆ ಮರ ಬಿದ್ದು ಮೃತಪಟ್ಟ ಕಬ್ಬಿನಗದ್ದೆ ನಿವಾಸಿ ವಿನಯ ಮಂಜುನಾಥ ಗಾಡೀಗ ಮೃತ ದೇಹ ಇಟ್ಟ ತಾಲೂಕ ಆಸ್ಪತ್ರೆಗೆ ಶಿರಸಿ ಉಪವಿಭಾಗಾಧಿಕಾರಿ (ಎಸಿ) ಕಾವ್ಯಾರಾಣಿ ಭೇಟಿ ನೀಡಿ ಮೃತನ ಸಂಬಂಧಿಕರಿಗೆ ಸಾಂತ್ವನ ಹೇಳಿದರು. ಸರ್ಕಾರದಿಂದ ಪರಿಹಾರವನ್ನು ಶೀಘ್ರವಾಗಿ ನೀಡುವ ಭರವಸೆಯನ್ನು ನೀಡಿದರು.

ಬನವಾಸಿಯಲ್ಲಿ ಬೆಳೆಹಾನಿ: ಬಿಜೆಪಿ ನಾಯಕರ ಸಮೀಕ್ಷೆ

ಯಲ್ಲಾಪುರ : ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿಯವರ ಸೂಚನೆಯಂತೆ  ಬನವಾಸಿಯ ಭಾಶಿ ಗ್ರಾಮಪಂಚಾಯತ್ ವ್ಯಾಪ್ತಿಯ ಮೊಗವಳ್ಳಿ ಗ್ರಾಮದಲ್ಲಿ ವರದಾನದಿ ನೀರು  ರೈತರ ಹೊಲಗಳಿಗೆ ನುಗ್ಗಿ ನೆರೆ ಉಂಟಾದ ಬನವಾಸಿ ಪ್ರದೇಶಗಳಿಗೆ ಬಿಜಿಪಿಯ ಪ್ರಮುಖರು ಮತ್ತು ಕಾರ್ಯಕರ್ತರ ತಂಡ ಭೇಟಿ ನೀಡಿ ಸ್ಥಳೀಯರೊಂದಿಗೆ ನೆರೆ ಕುರಿತು ಮಾಹಿತಿ ಪಡೆದು,‌ಅಹವಾಲು ಸ್ವೀಕರಿಸಿ, ಚರ್ಚಿಸಿದರು.

 ಕಳೆದವಾರ ಸುರಿದ ಭೀಕರ ಮಳೆಯಿಂದಾಗಿ ವರದಾ ನದಿ ತುಂಬಿ ಹರಿಯುತ್ತಿದ್ದು,ಬನವಾಸಿ ಭಾಗದ ಮೊಗವಳ್ಳಿ ಗ್ರಾಮ ಹಾಗೂ ಸುತ್ತಲಿನ ಕೆಲವು ಕಡೆಗಳಲ್ಲಿ ರಸ್ತೆ ಸಂಪರ್ಕ ಕಡಿತವಾಗಿತ್ತು ಮತ್ತು  ಹೊಲಗಳಲ್ಲೆಲ್ಲ ಇನ್ನೂ ನೀರು ತುಂಬಿಕೊಡಿದ್ದು, ಅಪಾರ ಪ್ರಮಾಣದ ಭತ್ತ,ಮತ್ತು ಅಡಿಕೆ ತೋಟಗಳಿಗೆ ಹಾನಿ ಸಂಭವಿಸಿದೆ.

 ಅಲ್ಲಿಯ ಸಮಸ್ಯೆ, ಹಾನಿ ಮತ್ತು ಪರಿಹಾರೋಪಾಯಗಳ ಕುರಿತು ಸ್ಥಳೀಯರೊಂದಿಗೆ  ಚರ್ಚೆನಡೆಸಿದರು. ನಮ್ಮ ತಂಡವು ಸಂಸದರ ಸೂಚನೆಯ ಮೇರೆಗೆ ನೆರೆಯಿಂದಾದ ಹಾನಿ ಮತ್ತು ಸಮಸ್ಯೆ ಅರಿಯಲು ಬಂದಿದ್ದೇವೆ; ಸಂಸದರಿಗೆ ಈ ಬಗ್ಗೆ ಮಾಹಿತಿ ನೀಡಿ, ಸಂಸತ್ ಅಧಿವೇಶನ ಮುಗಿದ ಬಳಿಕ ಸಂಸದರು ಸ್ಥಳಕ್ಕೆ ಭೇಟಿ ನೀಡಿ ಇಲ್ಲಿ ಪ್ರತೀವರ್ಷ ನೆರೆಯಿಂದಾಗುವ ಸಮಸ್ಯೆಯ ಶಾಶ್ವತ ಪರಿಹಾರಕ್ಕೆ ಸರ್ಕಾರ ಮಟ್ಟದಲ್ಲಿ ಪ್ರಯತ್ನ ಕೈಗೊಳ್ಳುವಂತೆ ಮಾಡಲಾಗುವುದು ಎಂದು ರಾಜ್ಯ ವಕ್ತಾರ ಹರಿಪ್ರಕಾಶ ಕೋಣೆಮನೆ ತಿಳಿಸಿದರು.

ಹಾಗೂ ಸರ್ಕಾರ ಕೂಡಲೇ ಇಲ್ಲಿಯ ಹಾನಿ ಪರೀಶೀಲನೆ ನಡೆಸಿ ಸೂಕ್ತ ಪರಿಹಾರೋಪಾಯ ಕೈಗೊಳ್ಳಬೇಕೆಂದು ಆಗ್ರಹಿಸಿದರು.

ಭೇಟಿ ನೀಡಿದ ತಂಡದಲ್ಲಿ

ಬಿಜೆಪಿ ರಾಜ್ಯ ವಕ್ತಾರ ಹರಿಪ್ರಕಾಶ ಕೋಣೆಮನೆ,ಪಕ್ಷದ ಪ್ರಮುಖರಾದ ಎಲ್.ಟಿ. ಪಾಟೀಲ್, ಉಮೇಶ್ ಭಾಗ್ವತ, ಉಷಾ ಹೆಗಡೆ, ಮಂಜುನಾಥ್ ಪಾಟೀಲ್, ಪ್ರೇಮ್ ಕುಮಾರ್, ಅರವಿಂದ ಶೆಟ್ಟಿ, ಮಂಜುನಾಥ ನಾಯ್ಕ, ಗಣೇಶ ಸಣ್ಣಲಿಂಗಣ್ಣನವರ್, ವಿಶ್ವನಾಥ್ ಹಾದಿಮನಿ, ರಾಘವೇಂದ್ರ ಭಟ್ ಹಾಸಣಗಿ ಹಾಗೂ ಸ್ಥಳೀಯ ಗ್ರಾಮ ಪಂಚಾಯತ್ ಸದಸ್ಯರು, ಶಕ್ತಿಕೇಂದ್ರ ಮತ್ತು ಬೂತ್ ಪ್ರಮುಖರು ಇದ್ದರು.

ಆರ್ತಿಬೈಲ್ ಘಟ್ಟದಲ್ಲಿ ಅಪಘಾತ ಸ್ಕೂಟಿ ಚಾಲಕ ಮೃತ್ಯು

 

ಬೈಕ್ ಸವಾರನ ಮೇಲೆ ಮರದ ಟೊಂಗೆ ಬಿದ್ದು ಬೈಕ್ ಸವಾರನಿಗೆ ಗಾಯ

ಯಲ್ಲಾಪುರ : ಕಲಘಟಗಿಯಿಂದ ಯಲ್ಲಾಪುರ ಕಡೆಗೆ ಬೈಕ್ ಓಡಿಸಿಕೊಂಡು ಬರುತ್ತಿರುವಾಗ ರಾಷ್ಟ್ರೀಯ ಹೆದ್ದಾರಿ ಪಕ್ಕದ ಮರದ ಟೊಂಗೆಯೊಂದು ಬೈಕ್ ಸವಾರನ ತಲೆಯ ಮೇಲೆ ಮೇಲೆ ಬಿದ್ದ ಪರಿಣಾಮ ಗಾಯಗೊಂಡ ಆತನನ್ನು ಯಲ್ಲಾಪುರ ತಾಲೂಕ ಆಸ್ಪತ್ರೆಗೆ ದಾಖಲಾಗಿರುವ ಘಟನೆ ಮಂಗಳವಾರ ಸಂಜೆ ನಡೆದಿದೆ.

  ಗಾಯಾಳುವನ್ನು ಹೊಸಳ್ಳಿಯ ದೊಡ್ಲಾ ಹಾಲಿನ ಡೇರಿಯಲ್ಲಿ ಕೆಲಸ ಮಾಡುತ್ತಿರುವ ಕಲಘಟಗಿ ನಿವಾಸಿ ಮಾರುತಿ ಲಕ್ಷ್ಮಣ ಬಾಂದೇಕರ ಪ್ರಾಯ(44) ಎಂದು ಗುರುತಿಸಲಾಗಿದ್ದು,

ರಾಷ್ಟ್ರೀಯ ಹೆದ್ದಾರಿಯ 63ರ ಅರ್ಲಿಕೊಪ್ಪ ಗ್ರಾಮದ ಸಮೀಪ ಬರುತ್ತಿದ್ದಂತೆ ಮರದ ಟೊಂಗೆ ಬೈಕ್ ಸವಾರನ ಮೇಲೆ ಕಿತ್ತು ಬಿದ್ದಿದೆ. ಸುದೈವವಶಾತಃ ಬೈಕ್ ಸವಾರ ಹೆಲ್ಮೆಟ್ ಧರಿಸಿರುವ ಕಾರಣಕ್ಕೆ ತಲೆಗೆ ಯಾವುದೇ ಮಾರಣಾಂತಿಕವಾದ ಪೆಟ್ಟು ಆಗಲಿಲ್ಲ ಭುಜಕ್ಕೆ ಗಾಯವಾಗಿದ್ದು ತಾಲೂಕ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

    ಯಲ್ಲಾಪುರ ಪೊಲೀಸ್ ಠಾಣೆಯ ಉಪ ನಿರೀಕ್ಷಕರಾದ ಸಿದ್ದಪ್ಪ ಗುಡಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಿದ್ದಾರೆ. 

ಯಲ್ಲಾಪುರ ನ್ಯೂಸ್ ಗ್ರೂಪಿಗೆ ಬಂದು ಖಾಲಿ ಕೈಯಲ್ಲಿ ಮರಳಿದ ನೈಜಿರಿಯನ್ ಹುಳುಗಳು

ಯಲ್ಲಾಪುರ : ಯಲ್ಲಾಪುರ ನ್ಯೂಸ್ ವಿವಿಧ ವಿಭಾಗಗಳಲ್ಲಿ ನೂರಕ್ಕೆ ಹೆಚ್ಚು ವಾಟ್ಸಪ್ ಗ್ರೂಪ್ ಗಳನ್ನು ಸ್ಥಾಪಿಸಲಾಗಿದ್ದು, ಅದರಲ್ಲಿ ಕೆಲವು ಗ್ರೂಪ್ ಗಳ ಇನ್ವಿಟೇಶನ್ ಲಿಂಕ್ ಗಳನ್ನು ಭಹಿರಂಗವಾಗಿ ನೀಡಲಾಗಿತ್ತು.(ಗ್ರೂಪ್ ಗಳಲ್ಲಿ) ಎಲ್ಲಿಂದಲೂ ಈ ಗ್ರೂಪ್ ಗಳ ಇನ್ವಿಟೇಷನ್ ಲಿಂಕ್ ಪಡೆದ ನೈಜೀರಿಯನ್ ಐ ಎಸ್ ಡಿ ಸಂಖ್ಯೆ ಬಳಸಿ ಸೇರಿಕೊಂಡ ಹುಳುಗಳು, ನಾವು ಎಲ್ಲಾ ಸುರಕ್ಷಿತ ವಿಧಾನವನ್ನು ಅಳವಡಿಸಿಕೊಂಡಿರುವ ಕಾರಣಕ್ಕಾಗಿ ಯಾವುದೇ ಬೇಳೆ ಬೇಯಿಸಿಕೊಳ್ಳಲಾಗದೆ ಹಿಂದೆ ಮರಳಿದ್ದಾರೆ(ಫೋಟೊ ನೋಡಬಹುದು) ಅಂದರೆ ಲೆಫ್ಟ್ ಆಗಿದ್ದಾರೆ.

   ನಮ್ಮ ಓದುಗರ ಮಾಹಿತಿಗಾಗಿ +234xxxxxxxxxxxxx ಸಂಖ್ಯೆಯಿಂದ ಪ್ರಾರಂಭವಾಗುವ ಯಾವುದೇ ಸಂಖ್ಯೆಯ ಮೆಸೇಜ್ ಗಳನ್ನು ತೆರೆಯಬೇಡಿ. ಅವರು ನೀಡಿರುವ ಲಿಂಕ್ ಗಳನ್ನು ಕ್ಲಿಕ್ ಮಾಡಿ ಓಪನ್ ಮಾಡಬೇಡಿ, ನಿಮ್ಮ ಫೋನ್ ಭದ್ರತಾ ವ್ಯವಸ್ಥೆ ಹೊಂದದೆ ಇದ್ದರೆ ಫೋನ್ ಹ್ಯಾಕ್ ಆಗುವ ಸಾಧ್ಯತೆಯಿದ್ದು, ಬ್ಯಾಂಕ್ ಖಾತೆ ಇನ್ನಿತರ ಡೇಟಾಗಳು ಹ್ಯಾಕರ್ ಕೈಸೆರಿ ನೀವು ವಂಚನೆಗೆ ಒಳಗಾಗಬಹುದಾಗಿದೆ. 

   ಯಾವುದೇ ರೀತಿಯ ಆಫರ್, ಗೇಮ್,  ಗೇಮ್ ಪ್ರೆಡಿಕ್ಷನ್, ಫ್ರೀ ಆ‌್ಯಪ್ ಡೌನಲೋಡ್ ಲಿಂಕ್, ಮೋಡ್ ಆ‌್ಯಪ್ ಸ್ಟೋರ್, ಕ್ರಿಕೇಟ್ ಬೆಟ್ಟಿಂಗ್ ಆ‌್ಯಪ್ ಲಿಂಕ್(ಪ್ಲೇಸ್ಟೋರ್ ಹೊರತುಪಡಿಸಿ) ಲಿಂಕ್ ಕ್ಲಿಕ್ ಮಾಡಿ ಡೌನ್ಲೋಡ್ ಮಾಡಿಕೊಳ್ಳಬೇಡಿ. ಇದರಿಂದಾಗಿ ನಿಮ್ಮಬ್ಯಾಂಕ್ ಖಾತೆಯ ಹಣದೊಂದಿಗೆ, ಸೋಶಿಯಲ್ ಮೀಡಿಯಾ ಪಾಸ್ವರ್ಡ್ ಹ್ಯಾಕ್ ಆಗುವ ಸಾಧ್ಯತೆಯಿದ್ದು, ಸೋಶಿಯಲ್ ಮೀಡಿಯಾದಲ್ಲಿ ನೀವು ಇತರರೊಂದಿಗೆ ಹೊಂದಿರುವ ಫ್ರೆಂಡ್‌ಶಿಪ್  ಸಂಬಂಧಗಳು ಹಾಳಾಗಬಹುದಾಗಿದೆ. ಯಾವುದೇ ರೀತಿಯ QR code ಸ್ಕ್ಯಾನ್ ಮಾಡುವ ಪೂರ್ವದಲ್ಲಿ, ಎಸ್ಎಂಎಸ್ ಮೂಲಕ ಬಂದ ಓಟಿಪಿ ಬರ್ತಿ ಮಾಡುವ ಪೂರ್ವದಲ್ಲಿ ಹತ್ತಾರು ಬಾರಿ ಯೋಚಿಸಿ, ಸೋಶಿಯಲ್ ಮಿಡಿಯಾದಲ್ಲಿ ಗುರುತು‌ಪರಿಚಯ ಇಲ್ಲದವರೊಂದಿಗೆ, ನಮ್ಮ ಸ್ಥಳೀಯ ಹೆಸರು ಫೋಟೊ ಬಳಸಿದವರೊಂದಿಗೆ ಸ್ನೇಹಿತರಾಗಬೇಡಿ, ಅವರು ಎಸೆದ ತುಣುಕಿನ ಗಾಳಕ್ಕೆ ಸಿಲುಕಿ ಬ್ಲಾಕ್ ಮೇಲ್ ಗೆ ಒಳಗಾಗಬೇಡಿ, ಎಲ್ಲಕ್ಕಿಂತ ಮುಖ್ಯವಾಗಿ ಆನಲೈನ್ ಲೋನ್ ಪಡೆದು ಎಷ್ಟೆ ಗಟ್ಟಿಗಾರಾದರೂ ಕೊನೆಯಲ್ಲಿ ಸೋಲುವಂತವರಾಗಬೇಡಿ.

    ಯಾವುದೇ ಭಾರತೀಯ ಜೀನಿಯನ್ ಕಂಪನಿಗೆ ಹೋಲಬಹುದಾದಂತಹ ವೆಬ್ ಸೈಟ್ ಗಳಂತೆ ಕಂಡುಬಂದರು ಅವುಗಳಿಂದ ಅಧಿಕೃತವಲ್ಲದ ಲಿಂಕ್ ಗಳಿದ್ದಾಗ ತೆರದು ನೋಡಲು ಕೂಡ ಹೋಗಬೇಡಿ. 

  ಯಲ್ಲಾಪುರ ನ್ಯೂಸ್ ಆಗಾಗ ಈ ಕುರಿತು ಎಚ್ಚರಿಕೆ ನೀಡುತ್ತಲೇ ಇದೆ ಜಾಗೃತರಾಗಿ ಸುರಕ್ಷಿತರಾಗಿ.

ಇನ್ನೂ ಮುಂದೆ ಆನಲೈನ್ ವಂಚನೆಯ ಬಗ್ಗೆ ಪ್ರತಿ ರವಿವಾರ ನಿಮ್ಮ ಯಲ್ಲಾಪುರ ನ್ಯೂಸ್ ನಲ್ಲಿ ಸತೀಶ ಮಾಗೋಡ ಅವರು ಬರೆಯುತ್ತಾರೆ. ತಪ್ಪದೇ ಓದಿ ಜಾಗೃತರಾಗಿ.

ವಜ್ರಳ್ಳಿಯಲ್ಲಿ ಪಶುಸಂಗೋಪನೆ ಕುರಿತು ಮಾಹಿತಿ ಕಾರ್ಯಾಗಾರ ಯಶಸ್ವಿ

ಯಲ್ಲಾಪುರ : ಭಾಗ್ಯಶ್ರೀ ಸಂಜೀವಿನಿ ಗ್ರಾಮ ಪಂಚಾಯತಿ ಮಟ್ಟದ ಒಕ್ಕೂಟ ಮತ್ತು ಗ್ರಾ.ಪಂ ವಜ್ರಳ್ಳಿ ವ್ಯಾಪ್ತಿಯ ಭಾಗ್ಯಶ್ರೀ ಸಂಜೀವಿನಿ ವಾರ್ಡ ಮಟ್ಟದ ಒಕ್ಕೂಟ ಆಶ್ರಯದಲ್ಲಿ ತೇಲಂಗಾರ ಗ್ರಾಮದಲ್ಲಿ ಪಶುಸಂಗೋಪನೆ ಕುರಿತು ಇತ್ತೀಚೆಗೆ ಮಾಹಿತಿ ಕಾರ್ಯಾಗಾರ ಯಶಸ್ವಿಯಾಗಿ ನಡೆಯಿತು.

   ಕಾರ್ಯಕ್ರಮದಲ್ಲಿ ಪಶುವೈದ್ಯಾಧಿಕಾರಿ ಕೆ.ಜಿ.ಹೆಗಡೆ ಅವರು ಪಶುಸಂಗೋಪನೆ, ಪಶು ಆಹಾರ, ಜಾನುವಾರುಗಳ ತಳಿಗಳ ಕುರಿತು ಮತ್ತು ಪಶು ವೈದ್ಯಕೀಯ ಇಲಾಖೆಯಲ್ಲಿ ಲಭ್ಯವಿರುವ ಸೌಲಭ್ಯಗಳ ಬಗ್ಗೆ ವಿವರವಾಗಿ ತಿಳಿಸಿದರು.

   ಗ್ರಾಮ ಪಂಚಾಯತಿ ವಜ್ರಳ್ಳಿ ಅಧ್ಯಕ್ಷರಾದ ಭಗೀರಥ ನಾಯ್ಕ ಅವರು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. 

  ಹಾಲು ಉತ್ಪಾದಕರ ಸಂಘದ ಅಧ್ಯಕ್ಷರಾದ ನಾರಾಯಣ ಭಟ್ಟ ಮತ್ತು ಉಪಾಧ್ಯಕ್ಷರಾದ ಅನ್ನಪೂರ್ಣ ಭಟ್ಟ ಉಪಸ್ಥಿತರಿದ್ದು ಮಾತನಾಡಿದರು. ವಾರ್ಡ ಮಟ್ಟದ ಒಕ್ಕೂಟದ ಅಧ್ಯಕ್ಷರಾದ ಯಮುನಾ ಭಟ್ಟರವರು ಸಭೆಯ ನೇತೃತ್ವ ವಹಿಸಿದ್ದರು. ಹಾಲು ಉತ್ಪಾದಕರ ಸಂಘದ ಕಾರ್ಯದರ್ಶಿ ನರಸಿಂಹ ಗಾಂವ್ಕಾರ್ ಮತ್ತು ವಲಯ ಮೇಲ್ವಿಚಾರಕರು (ಕೌಶಲ್ಯ) ಶರೀಫಾಬಿ ಮುಲ್ಲಾ ಉಪಸ್ಥಿತರಿದ್ದರು.

   ಪಶು ಸಖಿ ಹೇಮಾ ಆಚಾರಿಯವರ ಪ್ರಾರ್ಥಿಸಿದರು.  ವಲಯ ಮೇಲ್ವಿಚಾರಕರಾದ ರಾಜಾರಾಮ ವೈದ್ಯ ಪ್ರಾಸ್ತಾವಿಕಗೈದರು. ಭಾಗೀರಥಿ ಭಟ್ಟ ಸ್ವಾಗತಿಸಿದರು ಮತ್ತು ಹೇಮಾ ಆಚಾರಿ ವಂದಿಸಿದರು. ಗ್ರಾಮ ಪಂಚಾಯತಿ ಸದಸ್ಯರಾದ ರತ್ನಾ ಬಾಂದೇಕರ ಕಾರ್ಯಕ್ರಮ ನಿರೂಪಿಸಿದರು.

   ಭಾಗ್ಯಶ್ರೀ ಸಂಜೀವಿನಿ ಗ್ರಾಮ ಪಂಚಾಯತಿ ಮಟ್ಟದ ಒಕ್ಕೂಟ ಮತ್ತು ಸಿಬ್ಬಂದಿಗಳು,ವಾರ್ಡ ಮಟ್ಟದ ಒಕ್ಕೂಟದ ಪದಾಧಿಕಾರಿಗಳು ಮತ್ತು ಸ್ವ ಸಹಾಯ ಸಂಘದ ಸದಸ್ಯರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

   ಜಾನುವಾರುಗಳ ಆರೋಗ್ಯ ಮತ್ತು ಉತ್ಪಾದಕತೆಯನ್ನು ಸುಧಾರಿಸಲು ಬಳಸಲು, 

ಈ ಕಾರ್ಯಾಗಾರದಿಂದಾಗಿ ಗ್ರಾಮೀಣ ಪ್ರದೇಶದ ಜನರಿಗೆ ಪಶುಸಂಗೋಪನೆ ಕುರಿತು ಉಪಯುಕ್ತ ಮಾಹಿತಿ ದೊರೆಯಿತು.

ಯಲ್ಲಾಪುರ: ಯಲ್ಲಾಪುರ ಲಾರಿ ಚಾಲಕರ ಮತ್ತು ಮಾಲಕರ ಸಂಘದ ಸದಸ್ಯರು ಸೋಮವಾರ ಅಂಕೋಲಾದ ಶಿರೂರು ಪ್ರದೇಶದಲ್ಲಿ ಗುಡ್ಡ ಕುಸಿದ ಸ್ಥಳಕ್ಕೆ ಭೇಟಿ ನೀಡಿ, ರಸ್ತೆ ಪಕ್ಕದಲ್ಲಿ ನಿಂತ ಲಾರಿ ಚಾಲಕರು ಕ್ಲೀನರ್ ಗಳ ಪರಿಸ್ಥಿತಿಯನ್ನು ಅವಲೋಕಿಸಿ ಆಗುತ್ತಿರುವ ಸಮಸ್ಯೆಗಳ ಬಗ್ಗೆ ಆಲಿಸಿದರು.

 

 ನಂತರ ಅಲ್ಲಿನ ಅಧಿಕಾರಿಗಳು ಮತ್ತು ಜನಪ್ರತಿನಿಧಿಗಳನ್ನು ಭೇಟಿಯಾಗಿ, ರಸ್ತೆ ಪಕ್ಕದಲ್ಲಿ ನಿಂತಿರುವ ಲಾರಿಗಳ ಚಾಲಕರ ದೈನಂದಿನ ಊಟ ಇನ್ನಿತರ ವ್ಯವಸ್ಥೆಯ ಬಗ್ಗೆ ಗಮನ ಸೆಳೆದುರು. ಮತ್ತು ಮಣ್ಣಿನಡಿಯಲ್ಲಿ ಸಿಲುಕಿರುವ ಸಾಧ್ಯತೆಯುಳ್ಳ ಚಾಲಕರನ್ನು ಬೇಗ ಪತ್ತೆಹಚ್ಚಲು ಕೇಳಿಕೊಂಡರು.  

   ಈ ಸಂದರ್ಭದಲ್ಲಿ, ಯಲ್ಲಾಪುರ ಸಂಘದ ಅಧ್ಯಕ್ಷ ಸುಜಯ್ ಮರಾಠಿ, ಕಾರ್ಯದರ್ಶಿ ಅಮಿತ್ ನಾಯ್ಕ, ಖಜಾಂಚಿ ಖ್ವಾಜಾ ಅತ್ತರ್, ಗೌರವಾಧ್ಯಕ್ಷ ಮಹೇಶ ನಾಯ್ಕ, ನಾಗೇಂದ್ರ ಭಟ್, ಸುಧಿ ಭಟ್, ಅಮಿತ ನಾಯಕ, ಸಂಕೇತ ನಾಯಕ, ಸಾದಿಕ್, ಮುರಳಿ ರಾವಲ್ ಹಾಗೂ ಇನ್ನಿತರ ಸದಸ್ಯರು ಭಾಗವಹಿಸಿದರು. ರಕ್ಷಣಾ ಕಾರ್ಯದಲ್ಲಿ ತೊಡಗಿರುವ ಪೊಲೀಸ್ ಎಸಿಪಿ ಮತ್ತು ಸಿಬ್ಬಂದಿಗಳು, ಹಾಗೆಯೇ ಕಾರವಾರ ಶಾಸಕರಾದ ಸತೀಶ್ ಸೈಲ್ ಅವರನ್ನು ಭೇಟಿ ಮಾಡಿ, ರಕ್ಷಣಾ ಕಾರ್ಯಗಳ ಬಗ್ಗೆ ಮಾಹಿತಿಯನ್ನು ಪಡೆದರು.

  ಚಾಲಕ ಅರ್ಜುನ್ ನ ಪತ್ತೆಹಚ್ಚುವ ಕುರಿತು ಅಧಿಕಾರಿಗಳು ಮತ್ತು ಚಾಲಕ ಮಾಲಿಕರ ನಡುವೆ ಮಾತಿನ ವಾಗ್ವಾದ ನಡೆಯಿತು. ರಸ್ತೆ ಪಕ್ಕದಲ್ಲಿ ನಿಂತಿರುವ ಲಾರಿ ಚಾಲಕರಿಗೆ ಊಟದ ವ್ಯವಸ್ಥೆ ಮಾಡುವಂತೆ ಯಲ್ಲಾಪುರ ಚಾಲಕ ಮಾಲಿಕ ಸಂಘದವರು ಜಿಲ್ಲಾಡಳಿತವನ್ನು ಕೇಳಿಕೊಂಡರು.

   ಯಲ್ಲಾಪುರ ಸಂಘದವರು ಮುಂದಿನ ದಿನಗಳಲ್ಲಿ, ಅವೈಜ್ಞಾನಿಕವಾಗಿ ರಸ್ತೆ ನಿರ್ಮಿಸಿ ದುಬಾರಿ ಟೋಲ್ ಸಂಗ್ರಹಿಸುತ್ತಿರುವ ಮತ್ತು ಸಾರ್ವಜನಿಕರಿಗೆ ತೊಂದರೆ ಉಂಟು ಮಾಡುತ್ತಿರುವ ಐಆರ್‌ಬಿ ಕಂಪನಿಯ ವಿರುದ್ಧ ಪ್ರತಿಭಟನೆ ನಡೆಸುವ ಎಚ್ಚರಿಕೆಯನ್ನು ನೀಡಿದರು.

ಯಲ್ಲಾಪುರ ಸಂಘದ ಅಧ್ಯಕ್ಷ ಸುಜಯ್ ಮರಾಠಿ ಹಾಗೂ ಗೌರವಾಧ್ಯಕ್ಷ ಮಹೇಶ‌ ನಾಯ್ಕ ಶಿರೂರ ಭೇಟಿಯ ನಂತರ ಯಲ್ಲಾಪುರ ನ್ಯೂಸ್ ಜೊತೆ ಮಾತನಾಡಿ, ಗುಡ್ಡ ಕುಸಿತದ ನಂತರ ಅಲ್ಲಿ ನಿಲ್ಲಿಸಿಕೊಂಡಿರುವ ವಾಹನ ಚಾಲಕರು ಮತ್ತು ಕ್ಲೀನರ್ ಪರಿಸ್ಥಿತಿಗಳು ಬಹಳ ಗಂಭೀರವಾಗಿದೆ. ಅದರಲ್ಲೂ ಬಾರಿ ವಾಹನಗಳ ಚಾಲಕರು ಎಲ್ಲಿಯೂ ಹೋಗದಂತ ಸ್ಥಿತಿ ನಿರ್ಮಾಣವಾಗಿದೆ ಅವರಿಗೆ ಸ್ಥಳದಲ್ಲಿ ಊಟ ಸಿಗುತ್ತಿಲ್ಲ. ಕುಟುಂಬಸ್ಥರನ್ನು ಸಂಪರ್ಕಿಸಲು ಸಾಧ್ಯವಾಗುತ್ತಿಲ್ಲ. ಮಾನವೀಯ ನೆಲೆಯಲ್ಲಿ ಅಲ್ಲಿಯ ಚಾಲಕರು ಕ್ಲೀನರ್ ಗಳಿಗೆ ಸ್ಥಳೀಯ ಆಡಳಿತಗಳು ವ್ಯವಸ್ಥೆ ಮಾಡಿಕೊಡಬೇಕು.

   ಕಾಣೆಯಾಗಿರುವ ಕೇರಳದ ಚಾಲಕನನ್ನು ಪತ್ತೆ ಮಾಡಲು ಕಾರ್ಯಾಚರಣೆಗೆ ಇನ್ನಷ್ಟು ವೇಗ ತುಂಬಬೇಕು ಎಂದು ಹೇಳಿದ್ದಾರೆ.

ಜಿಲ್ಲೆಯ ಎಲ್ಲ ಅಂಗನವಾಡಿ, ಪ್ರಾಥಮಿಕ, ಪ್ರೌಢಶಾಲೆ ಹಾಗೂ ಪಿಯು ಕಾಲೇಜುಗಳು ಮಂಗಳವಾರದಿಂದ ಪ್ರಾರಂಭ

ಯಲ್ಲಾಪುರ ; ಉತ್ತರ ಕನ್ನಡ ಜಿಲ್ಲೆಯಲ್ಲಿ ಎಲ್ಲಾ ತಾಲೂಕುಗಳ ಶಾಲೆ ಕಾಲೇಜುಗಳು ನಾಳೆ (ಜುಲೈ  23)ರಂದು ಪುನರಾರಂಭವಾಗುವುದು. ವಿದ್ಯಾರ್ಥಿಗಳು, ಶಿಕ್ಷಕರು ಹಾಗೂ ಸಿಬ್ಬಂದಿ ನಾಳೆ ಶಾಲೆಗೆ ಹಾಜರಾಗಬೇಕು. ಎಂದು ಅಪರ ಜಿಲ್ಲಾಧಿಕಾರಿ ತಿಳಿಸಿದ್ದಾರೆ.

 

  ಉತ್ತರ ಕನ್ನಡ ಜಿಲ್ಲೆಯಲ್ಲಿ ಸುರಿಯುತ್ತಿರುವ ಬಾರಿ ಮಳೆ, ಗುಡ್ಡ ಕುಸಿತ, ಭೂಕುಸಿತ, ರಸ್ತೆಯ ಮೇಲೆ ಮರ ಬೀಳುವುದು ಇತ್ಯಾದಿ ಅವಘಡ ಗಳಿಗೆ ಮಕ್ಕಳು ತುತ್ತಾಗಬಾರದು ಎಂದು ಜಿಲ್ಲಾಡಳಿತ ಜುಲೈ 15 ಸೋಮವಾರದಿಂದ ಜುಲೈ 22ರವರೆಗೆ ಪ್ರತಿದಿನ ಸಂಜೆ ಮಾರನೇ ದಿನದ ಸಂದರ್ಭವನ್ನು ಅವಲೋಕಿಸಿ ಅಂಗನವಾಡಿ, ಪ್ರಾಥಮಿಕ ಶಾಲೆ, ಪ್ರೌಢಶಾಲೆ ಹಾಗೂ ಪಿಯು ಕಾಲೇಜುಗಳಿಗೆ ಒಟ್ಟು ಎಂಟು ದಿನ ರಜೆ ನೀಡಿತ್ತು( ಒಂದು ರವಿವಾರ ಇನ್ನೊಂದು ಮೊಹರಂ ರಜೆ ಹೊರತುಪಡಿಸಿ). ಸೋಮವಾರದಿಂದ ಉತ್ತರ ಕನ್ನಡ ಜಿಲ್ಲೆಯಲ್ಲಿ ಸುಯುತ್ತಿರುವ ಮಳೆಯ ಪ್ರಮಾಣ ಕಡಿಮೆಯಾಗಿದ್ದು ಮುಂಜಾಗೃತ ಕ್ರಮವಾಗಿ ಹವಾಮಾನ ಇಲಾಖೆ ಕೂಡ ಯಾವುದೇ ಮುನ್ಸೂಚನೆ ನೀಡದೆ ಇರುವ ಕಾರಣಕ್ಕೆ ಜಿಲ್ಲಾಡಳಿತ ಮಂಗಳವಾರದಿಂದ ಶಾಲೆ ಕಾಲೇಜುಗಳು ಪುನರಾರಂಭಗೊಳ್ಳಲಿದೆ. ಶಾಲೆಯ ವಿದ್ಯಾರ್ಥಿಗಳು ಶಿಕ್ಷಕರು ಉಪನ್ಯಾಸಕರು ಹಾಜರಿರಬೇಕಾಗಿ ಸೂಚಿಸಿದೆ.

ಯಲ್ಲಾಪುರದಲ್ಲಿ ಗ್ರೀನ್ ಕೇರ್ ಸಂಸ್ಥೆಯಿಂದ ಉಚಿತ ಬ್ಯೂಟಿಶಿಯನ್ ಮತ್ತು ಫ್ಯಾಶನ್ ಡಿಸೈನಿಂಗ್ ತರಬೇತಿ

ಯಲ್ಲಾಪುರ: ಶಿಕ್ಷಣದ ಜೊತೆಗೆ ಕೌಶಲ್ಯ ಅಭಿವೃದ್ಧಿ ಕೂಡ ಯಶಸ್ಸಿಗೆ ಮುಖ್ಯ ಎಂದು ಯಲ್ಲಾಪುರ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಪ್ರಾಂಶುಪಾಲ ಡಾ. ಆರ್.ಡಿ. ಜನಾರ್ಧನ ಹೇಳಿದರು.

    ಅವರು ಸೋಮವಾರ ಅಡಿಕೆ ಭವನದಲ್ಲಿ ಗ್ರೀನ್‌ಕೇರ್ ಸಂಸ್ಥೆ ಮತ್ತು ಕ್ರಿಯೇಟಿವ್ ತರಬೇತಿ ಕೇಂದ್ರ ಆಯೋಜಿಸಿದ ಕೌಶಲ್ಯ ವಿಕಾಸ ಯೋಜನೆಯ ಉಚಿತ ಬ್ಯೂಟಿಶಿಯನ್ ಮತ್ತು ಬೆಸಿಕ್ ಫ್ಯಾಶನ್ ಡಿಸೈನಿಂಗ್ ತರಬೇತಿ ಕಾರ್ಯಕ್ರಮದ ಉದ್ಘಾಟಿಸಿ ಮಾತನಾಡಿದರು. ವರ್ತಮಾನದಲ್ಲಿ ಉದ್ಯೋಗಿಯಾಗಲು ಬೇಕಾದ ಕೌಶಲ್ಯಗಳನ್ನು ಸ್ವಪ್ರೇರಣೆಯಿಂದ ಪಡೆಯುವ ಅವಶ್ಯಕತೆ ಇದ್ದು, ಸ್ವಯಂ ಉದ್ಯೋಗಕ್ಕೆ ಅಗತ್ಯವಾದ ಕೌಶಲ್ಯಗಳನ್ನು ಈ ಯೋಜನೆ ಒದಗಿಸುತ್ತದೆ ಎಂದು ತಿಳಿಸಿದ ಜನಾರ್ಧನ, ಗ್ರೀನ್‌ಕೇರ್ ಸಂಸ್ಥೆಯ ಕಾರ್ಯವನ್ನು ಶ್ಲಾಘಿಸಿದರು.

   ಗ್ರೀನ್ ಕೇರ್ ಸಂಸ್ಥೆಯ ಅಧ್ಯಕ್ಷರಾದ ಪ್ರಶಾಂತ ಮುಳೆ ಕಾರ್ಯಕ್ರಮದ ಅಧ್ಯಕ್ಷತೆವಹಿಸಿ, ಯಶಸ್ಸಿಗೆ ಉತ್ತಮ ಸೇವೆಯ ಮನೋಭಾವ ಮುಖ್ಯ, ಇದನ್ನು ಭವಿಷ್ಯದಲ್ಲಿ ಅಳವಡಿಸಿಕೊಳ್ಳಿ ಎಂದು ಹೇಳಿದರು.

  ಅಸ್ಮಿತೆ ಫೌಂಡೇಶನ್‌ನ ಕಾರ್ಯನಿರ್ವಾಹಕ ನಿರ್ದೇಶಕ ರಿಯಾಜ್ ಸಾಗರ್ ಮಾತನಾಡಿ, ಉದ್ಯಮಶೀಲತೆಗೆ ಬೇಕಾದ ಕೌಶಲ್ಯಗಳನ್ನು ಈ ತರಬೇತಿ ನೀಡುತ್ತದೆ ಎಂದು ತಿಳಿಸಿ, ಅದನ್ನು ಸದುಪಯೋಗ ಪಡೆದುಕೊಳ್ಳುವಂತೆ ಯುವಕರಿಗೆ ಕರೆ ನೀಡಿದರು.

 

  ಗ್ರೀನ್ ಕೇರ್ ಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಜಿತೇಂದ್ರ ಕುಮಾರ್‌ಮಾತನಾಡಿ, 45 ದಿನಗಳ ಈ ತರಬೇತಿಯಲ್ಲಿ ಭಾಗವಹಿಸಲು ಆಸಕ್ತಿ ಹೊಂದಿರುವವರು ಗ್ರೀನ್‌ಕೇರ್ ಸಂಸ್ಥೆಯನ್ನು ಸಂಪರ್ಕಿಸಬಹುದು ಎಂದು  ತಿಳಿಸಿದರು.

 ಪತ್ರಕರ್ತರ ಸಂಘದ ಅಧ್ಯಕ್ಷ ಕೆ.ಎಸ್.ಭಟ್ಟ, ಪಟ್ಟಣ ಪಂಚಾಯತ್ ಸಮುದಾಯ ಸಂಘಟನಾಧಿಕಾರಿ ಹೇಮಾವತಿ ಭಟ್ ಮಾತನಾಡಿದರು.  

   ವೇದಿಕೆಯಲ್ಲಿ ಅಡಿಕೆ ವರ್ತಕರ ಸಂಘದ ಅಧ್ಯಕ್ಷ ಆರ್.ವಿ ಹೆಗಡೆ, ಗ್ರೀನ್‌ಕೇರ್ ಸಂಸ್ಥೆಯ ನಿರ್ದೇಶಕರಾದ ಸದಾಶಿವ ಶಿವಯ್ಯನಮಠ, ಗಜಾನನ ಭಟ್ಟ, ಉದಯ ನಾಯ್ಕ, ಉದಯ ಕುಮಾರ ಜಯಪ್ಪನವರ್, ಸಂಕಲ್ಪ ಸಮಗ್ರ ಅಭಿವೃದ್ಧಿ ಟ್ರಸ್ಟ್ ಅಧ್ಯಕ್ಷರಾದ ಕುಮಾರ ಜಿ. ಪಟಗಾರ ಉಪಸ್ಥಿತರಿದ್ದರು.

ಕ್ರಿಯೇಟಿವ್ ತರಬೇತಿ ಕೇಂದ್ರದ ಶ್ರೀನಿವಾಸ ಎಂ ಮುರ್ಡೇಶ್ವರ ಸ್ವಾಗತಿಸಿದರು, ಗ್ರೀನ್‌ಕೇರ್ ಸಂಸ್ಥೆಯ ಉಪಾಧ್ಯಕ್ಷರಾ ರೋಹಿಣಿ ಸೈಲ್ ವಂದಿಸಿದರು, ಸಂಸ್ಥೆಯ ನಿರ್ದೇಶಕಿ ಆಶಾ ಡಿಸೋಜಾ ಕಾರ್ಯಕ್ರಮವನ್ನು ನಿರೂಪಿಸಿ ನಿರ್ವಹಿಸಿದರು.

✒️✒️ ** ಹೆಬ್ಬುಳ ಕ್ರಾಸ್‌ನಲ್ಲಿ ರಸ್ತೆ ಹಾನಿಯಿಂದ ವಾಹನ ಸಂಚಾರಕ್ಕೆ ತಾತ್ಕಾಲಿಕ ನಿಷೇಧ, ✒️✒️ ** ಹೆಬ್ಬುಳ ಹಾಗೂ ಗೋಕರ್ಣ ಕ್ರಾಸ್ ರಸ್ತೆಯಲ್ಲಿ ಭಾರೀ ವಾಹನ ಅಪಘಾತ, ಹೊಂಡ ಕಾರಣ

ಯಲ್ಲಾಪುರ: ಇತ್ತೀಚಿನ ಭಾರಿ ವಾಹನ ಸಂಚಾರ ಹಾಗೂ ಮಳೆಯಿಂದ ಹೆಬ್ಬುಳ ಕ್ರಾಸ್ ಬಳಿ ರಸ್ತೆ ಹಾನಿಯಾಗಿದೆ, ಪರಿಣಾಮ ಮಂಗಳೂರು, ಉಡುಪಿ, ಕುಮಟಾಕ್ಕೆ ತೆರಳುವ ಬಸ್ ಹಾಗೂ ಇತರೆ ವಾಹನಗಳ ರಸ್ತೆ ಪ್ರವೇಶವನ್ನು ತಾತ್ಕಾಲಿಕವಾಗಿ ನಿಷೇಧಿಸಲಾಗಿದೆ.

 ಕಳೆದ ಒಂದು ವಾರದ ಹಿಂದೆ ಅಂಕೋಲಾ ತಾಲೂಕಿನ ಶಿರೂರಿನಲ್ಲಿ ಗುಡ್ಡ ಕುಸಿತದಿಂದಾಗಿ ರಾಷ್ಟ್ರೀಯ ಹೆದ್ದಾರಿ ಮಣ್ಣು ಮತ್ತು ಕಲ್ಲುಗಳಿಂದ ಆವರಿಸಿಕೊಂಡಿತ್ತು. ಈ ಪ್ರದೇಶದಲ್ಲಿ ಈಗಲೂ ಸ್ವಚ್ಛಗೊಳಿಸುವ ಕಾರ್ಯ ಪ್ರಗತಿಯಲ್ಲಿದ್ದು, ಸಂಚಾರ ಮುಕ್ತವಾಗಿಲ್ಲ. ಕುಸಿತದಿಂದಾಗಿ ಹುಬ್ಬಳ್ಳಿ, ಯಲ್ಲಾಪುರ, ಬೆಳಗಾವಿಯಿಂದ ಕುಮಟಾ, ಮಂಗಳೂರು, ಉಡುಪಿಗೆ ತೆರಳುವ ವಾಹನಗಳು 20 ಕಿಮೀ ತೆರಳಬೇಕಾಗಿತ್ತು. ಈ ಮಾರ್ಗದಲ್ಲಿ ಹೆಚ್ಚು ಭಾರಿ ವಾಹನ ಸಂಚಾರದಿಂದ ಕೇವಲ ಆರು ದಿನಗಳಲ್ಲಿ ರಸ್ತೆ ಹಾಳಾಗಿದೆ ಎಂದು ಸ್ಥಳೀಯ ಚಾಲಕರು ತಿಳಿಸಿದ್ದಾರೆ.

   ಸೋಮವಾರ ಬೆಳಿಗ್ಗೆ ಆರು ಗಂಟೆಯಿಂದ ಯಲ್ಲಾಪುರ ಮೂಲಕ ಕುಮಟಾ, ಹೊನ್ನಾವರ, ಮಂಗಳೂರು, ಉಡುಪಿಗೆ ತೆರಳುವ ಬಸ್‌ಗಳನ್ನು ಯಲ್ಲಾಪುರದಲ್ಲೇ ತಡೆಯಲಾಗಿದೆ. ಇತರೆ ವಾಹನಗಳಿಗೆ ಹೆಬ್ಬುಳ ಕ್ರಾಸ್‌ನಲ್ಲಿ ಪ್ರವೇಶವನ್ನು ತಡೆದ ಬ್ಯಾರಿಕೇಡ್‌ ಮತ್ತು ಸೂಚನಾ ಫಲಕಗಳನ್ನು ಅಳವಡಿಸಲಾಗಿದೆ. ಈ ಸಮಯದಲ್ಲಿ ಲೋಕೋಪಯೋಗಿ ಇಲಾಖೆಯ ಅಂಕೋಲ ವಿಭಾಗದವರು ಹಾನಿಯಾದ ರಸ್ತೆಗಳಿಗೆ ಕಲ್ಲು ತುಂಬಿ ತಾತ್ಕಾಲಿಕ ದುರಸ್ತಿ ಕಾರ್ಯ ಕೈಗೊಂಡಿದ್ದಾರೆ, ಆದಾಗ್ಯೂ ಯಾವುದೇ ವಾಹನ ಸಂಚಾರಕ್ಕೆ ನಿಷೇಧ ಹೇರಲಾಗಿದೆ.

   ಸೋಮವಾರ ಕುಮಟಾಗೆ ತೆರಳಲು ಪ್ರಯತ್ನಿಸಿದ ಯಲ್ಲಾಪುರದ ಹಲವರು ನಿರಾಶೆಯಿಂದ ಮತ್ತೆ ಯಲ್ಲಾಪುರಕ್ಕೆ ಮರಳಿದ್ದಾರೆ.

ಹೆಬ್ಬುಳ ಹಾಗೂ ಗೋಕರ್ಣ ಕ್ರಾಸ್ ರಸ್ತೆಯಲ್ಲಿ ಭಾರೀ ವಾಹನ ಅಪಘಾತ, ಹೊಂಡ ಕಾರಣ

ಹೆಬ್ಬುಳ ಕ್ರಾಸ್ ಮತ್ತು ಮಾದನಗೇರಿ ಗೋಕರ್ಣ ಕ್ರಾಸ್ ನಡುವಿನ 20 ಕಿಲೋಮೀಟರ್ ರಸ್ತೆಯಲ್ಲಿ ಭಾರೀ ವಾಹನ ಅಪಘಾತ ಸಂಭವಿಸಿದೆ. ಈ ಘಟನೆಯಲ್ಲಿ ಹಲವಾರು ವಾಹನಗಳು ರಸ್ತೆಯ ಪಕ್ಕದಲ್ಲಿ ಉರುಳಿಕೊಂಡುಬಿದ್ದಿವೆ.

   ಈ ಅಪಘಾತಕ್ಕೆ ಕಾರಣವಾಗಿರುವುದು ರಸ್ತೆಯಲ್ಲಿರುವ ದೊಡ್ಡ ದೊಡ್ಡ ಹೊಂಡ ಹಾಗೂ ಕಿರಿದಾದ ರಸ್ಯೆಯಾಗಿದೆ.  ವಾಹನಗಳು ಎದುರಿನಿಂದ ಬರುವ ವಾಹನಗಳಿಗೆ ಜಾಗ ಮಾಡಿಕೊಡಲು ಪಕ್ಕಕ್ಕೆ ತಿರುಗುವಾಗ ನಿಯಂತ್ರಣ ಕಳೆದುಕೊಂಡು ಅಪಘಾತಕ್ಕೀಡಾಗಿವೆ. ಈ ಅಪಘಾತಗಳಿಂದಾಗಿ ಸಂಚಾರ ದಟ್ಟಣೆ ಉಂಟಾಗಿದೆ. ಸ್ಥಳೀಯ ಪೊಲೀಸರು ಮತ್ತು ಲೋಕೋಪಯೋಗಿ ಇಲಾಖೆಯ ಅಧಿಕಾರಿಗಳು ಸ್ಥಳಕ್ಕೆ ಧಾವಿಸಿ ಸಂಚಾರವನ್ನು ನಿಯಂತ್ರಿಸುತ್ತಿದ್ದಾರೆ. ಹಳ್ಳವನ್ನು ಮುಚ್ಚಲು ಕ್ರಮ ಕೈಗೊಳ್ಳಲಾಗುತ್ತಿದೆ.

   ಈ ಘಟನೆಯಲ್ಲಿ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ ಎಂದು ತಿಳಿದುಬಂದಿದೆ. ಆದರೆ, ಹಲವಾರು ವಾಹನಗಳಿಗೆ ಹಾನಿಯಾಗಿದೆ.